Сонуннар‎ > ‎

Сахалыы ситим-сир үөдүйэрин туһугар

Отправлено 14 мар. 2016 г., 17:35 пользователем Кибер Саха   [ обновлено 15 мар. 2016 г., 0:52 ]
Баччааҥҥа диэри сахалыы ситим-сирдэр тыһыынчаннан-мөлүйүөнүнэн үөдүйэ иликтэр. Ол төрүөтэ туохханый уонна оҥоруох дьону туох хааччахтырый?
Дьиҥинэн, сахалыы сиим-сирдэниэхтэрин баҕарар дьон да, тэрилтэ да элбэх. Сорох ситим-сир нөҥүө бэйэтин табаарын атыылыан баҕарар, сорох бэйэтин туһунан кэпсиэн баҕарар, сорох - санаатын тарҕатыан. Ону таһынан Тыллар тустарына СӨ сокуона ирдииринэн, өрөспүүбүлүкэҕэ үлэлиир тэрилтэ бэйэтин үлэтин, оҥорор өҥөтүн туһунан сахалыы информацияны дьоҥҥо биэриэхтээх, уонна дьон сахалыы ыйыттахтарына хоруйдуохтаах (ол иһигэр ситим бэрэстэбиитэлистибэтин нөҥүө).
Аанньа үөдүйбэт төрүөттэрэ манныктар: сатыыр дьон аҕыйах, ситим-сир оҥорорго тэрил оччо табыгаһа суох, үп-харчы тиийбэт.  Үбү-харчыны дьиҥинэн булуохха сөп, ситим-сири син биир оҥорор эбээһинэстээх дьоҥҥо нууччалыыга эбии сахалыы барыл баара бырайыагы улаханнык ыараппат. Онон, үп-харчы тиийбэт диэһин, дьиҥинэн, ирдэбил итэҕэһэ.

Сатыыр дьон суоҕа эмиэ улахан кыһалҕа буолбатах. Ситим-уустар Саха сиригэр, ол иһигэр сахалыы үчүгэйдик билээччилэр элбэхтэр. Кинилэргэ сорук эрэ туруорар кэрэх, оҥорон киирэн барыа этилэр. Аны ханнык эрэ сүбэ-ама биэрэр тэрилтэ баара буоллар, сатаабат да дьон сатыыр буолуо этилэр. Сатаатар бэйэлэрин блогтарын оҥорор таһымҥа тахсыа этилэр.

Ол аата бастакы кыһалҕабыт аналлаах тэрил суоҕар сытар.

Маннык хаамыылары оҥорор көдьүүстээх буолуон сөп:
 
1. Ситим-сир (веб-саайт) оҥорор CMS-программалар (движоктар) алтыһааннарын (интерфейстэрин) сахалыы тылбаастыахтаахпыт: Wordpress, Joomla!, Drupal, Битрикс уо.д.а. (сорҕото босхо, атына кэмиэрчэскэй).
2. Ситим-сирдэри икки-үс тылынан оҥорорго көмө буолар бэлэм надстройкалар/тиэмэлэр баар буолуохтаахтар (босхо да, төлөбүрдээх да).
3. Сахалыы ситим-сирдэринэн дьарыктанар аналлаах структура (лаборатория, саатар хамнастаах соҕотох киһи) баар буолуохтаах. Бу тэрилтэ информацияны түмүөхтээх уонна консультациялыырга, көмөлөһөргө бэлэм буолуохтаах. Туспа бэйэтэ сиэрбэрдээх буоллара өссө ордук.
4. Сахалыы мобильнай интэриниэти сайыннарар пуонда баар буолара буоллар.
5. Андроид алтыһаана сахалыы тылбастаныахтаах.
6. Интэриниэт-браузердар алтыһааннара сахалыы тылбаастаныахтаах.
7. Саха тыла Гуугулга киириэхтээх.
8. Учуонайдар бигэргэппит АйТи-гэ сыһыаннаах тыллар сахалыы тыллыктара (словник, вокабуляр), тылдьыттара, ыйынньыктара (методические указания) тахсыахтаахтар.
9. Тэрилтэлэргэ судаарыстыба өттүттэн (өрөспүүбүлүкэ былааһыттан) ирдэбил баар буолуохтаах. Холобура, Рособрнадзор оскуолалартан оскуола саайтыгар икки судаарыстыба тылынан толору информация баар буоларын ирдиэхтээх.

Манна тугу эрэ эбэрдээх буоллаххытына, аллара ырытыы быһыытынан суруйуҥ дуу.
Comments